Қазақ Су шаруашылығы ғылыми-зерттеу институтының ғылыми-зерттеу және ғылыми-техникалық жұмыстар нәтижелерін коммерцияландыру аясында 2025–2027 жылдарға арналған «Ғылыми негізделген су үнемдеу технологияларын ұйымдастыру және енгізу» тақырыбындағы гранттық қаржыландыру жобасы жүзеге асырылуда.

Жобаның мақсаты – институт ғалымдары жер және су ресурстарын ұтымды пайдалану мен мелиорациялау жөніндегі ғылыми-техникалық бағдарлама аясында әзірлеген, пайдалану сипаттамалары жақсартылған инновациялық жаңбырлатқыш саптама (инновациялық патент №30920) негізінде отандық жаңбырлатқыш машиналарды нарыққа шығару болып табылады.

Жоба су үнемдеудің заманауи суару технологияларын енгізуге, ауыл шаруашылығындағы су ресурстары шығындарын азайтуға және суармалы егіншіліктің тиімділігін арттыруға бағытталған.

Жобаны іске асыруға «ҚазСШҒЗИ» ЖШС, «ADAM manufacturing» ЖШС және «SPACETIME» ЖК қатысуда.

Институт әзірленген технологияны өндіріске енгізу бойынша ғылыми-консультациялық сүйемелдеуді қамтамасыз етеді. Жоба жаңбырлатқыш машиналарды шағын сериямен өндіруді ұйымдастыруды, өнімді сертификаттауды, ішкі нарықта ілгерілетуді және ЕАЭО елдеріне экспортқа шығаруды көздейді. Жоспарланған өндірістік қуаттылық жылына 40 бірлікке дейін жаңбырлатқыш машина шығаруды құрайды.

Жобаны гранттық қаржыландыру көлемі 350 млн теңгені құрайды, сонымен қатар жеке серіктес тарапынан 145 млн теңге көлемінде қосымша тең қаржыландыру қарастырылған. Жобаны іске асыру отандық жаңбырлатқыш машиналар өндірісін дамытуға, ғылыми зерттеулер нәтижелерін экономиканың нақты секторына енгізуге және Қазақстан Республикасының су саласындағы ғылыми-инновациялық әлеуетін нығайтуға ықпал етеді.